Serial Experiments Lain
| Serial Experiments Lain | |
 Јапонскиот плакат | |
| Жанр | киберпанк психолошки ужаси техно-ужас |
|---|---|
| Творец | Јасујуки Уеда |
| Аниме-серија | |
| Режисер | Рјутаро Накамура |
| Продуцент |
|
| Сценарист | Чиаки Конака |
| Композитор | Реичи Накаидо |
| Студио | Triangle Staff |
| Давател на лиценца | Crunchyroll |
| Мрежа | TXN (TV Tokyo) |
| Англиска мрежа | KTEH, TechTV, Funimation Channel |
| Оригинално прикажување | 6 јуни 1998 — 28 септември 1998 |
| Епизоди | 13 |
| Игра | |
| Serial Experiments Lain | |
| Развивач | Pioneer LDC |
| Издавач | Pioneer LDC |
| Подлоги | PlayStation |
| Издадена | 26 ноември 1998 |
| Манга | |
| The Nightmare of Fabrication | |
| Автор | Јошитоши Абе |
| Објавена | мај 1999 |
| Игра | |
| Signal | |
| Развивач | Team MJM |
| Подлоги | Windows, macOS |
| Издадена | 19 мај 2025 |
Serial Experiments Lain (јапонски: シリアルエク, буквално: Експерименти Лејн) — аниме-серија во режија на Рјутаро Накамура, објавена во 1998 г. Серијата раскажува за Мрежата и реалниот свет, како и за девојката по име Лејн Ивакура што живее во нив. Во анимето се допираат различни филозофски прашања, како што се реалноста, идентитетот и општењето. Serial Experiments Lain исто така се занимава со обединувањето на аналогниот свет од крајот на XX век со цифрениот, човековото постоење на интернет и „поклонението на Бог преку технологијата“.
Сценарист на серијата бил Чиаки Конака, продуцент Јасујуки Уеда, а за дизајнот на ликовите бил задолжен Јошитоши Абе. Над звукот и музиката работеле Акира Такемото и Коџи Касамацу, а воведната песна Duvet ја извела британската рок-група Bôa. Првично, Serial Experiments Lain била планирана како мултимедијално дело, во чиј центар требало да биде истоимената видеоигра, која би била дополнета со аниме и романи.
Serial Experiments Lain добил признание од критичарите како култно и новаторско дело. Анимето често било споредувано со „Евангелион“, особено во однос на психолошките теми и ликот на главната јунакиња, иако творците отфрлиле какви било непосредни паралели. Серијата е наречена класика на киберпанкот и едно од најпсиходеличните анимеа; тоа редовно влегува во списоците на најдобри анимирани дела. Печатот го истакнал нејзиното влијание врз понатамошниот развој на тематиката на виртуелната реалност, кризата на идентитетот и границата помеѓу цифрениот и физичкиот свет.
Содржина
[уреди | уреди извор]Главната јунакиња — Лејн Ивакура — е тивка и скромна ученичка од гимназија, која заостанува зад современите трендови. Нејзиното мирно постоење се нарушува кога на нејзиниот таканаречен мрежен терминал „NAVI“ пристигнува чудна електронска пошта од соученичка што дотогаш веќе извршила самоубиство. Во пораката се тврди дека во „просторот каде што не е потребно тело“ (интернетот), „постои Бог“. За да го сфати значењето на писмото, Лејн започнува поподробно да се интересира за својот „NAVI“.
Низа чудни настани ја повлекуваат Лејн во светот на Мрежата, каде што таа постепено сфаќа дека многу нешта во тој свет можеби не се она што изгледаат на прв поглед — а тоа пред сѐ се однесува на самата Лејн. Филозофските прашања што се поставуваат во серијалот се тесно испреплетени со сферата на информатичките технологии, каде што владеат разумот и логиката.[1][2]
Ликови
[уреди | уреди извор]Лејн Ивакура (јап. 岩倉 玲音) — скромна, срамежлива и замислена девојка, склона кон осаменост. Таа живее во Јапонија со своето семејство, оди на училиште и општи со неколку другарки, но одеднаш влегува во виорот на настани поврзан со светската Мрежа и таинствената заедница наречена „Витези“. Откако добива електронска пошта од покојната Чиса, Лејн одлучува да истражи колку се меѓусебно поврзани реалниот свет и светот на Мрежата. Лејн се обидува да ја одгатне загатката на Мрежата, а подоцна и загатката на сопственото постоење. Се испоставува дека Лејн има колосални способности во областа на компјутерските технологии и Мрежата. Се открива дека таа не е човек, туку програма што добила тело и крв. За да го спаси реалниот свет, таа мора да замине во Мрежата и да ги избрише сите спомени за своето постоење во светот на луѓето.
Алиса Мизуки (јап. 瑞城 あり) — најдобра другарка на Лејн. Таа се грижи за Лејн и се труди да ѝ помага и поддржува во сѐ. Лејн многу го цени тоа и ја сака својата другарка, исто така се обидува да направи сѐ што е можно најдобро за неа. Името на јунакињата е упатување кон ликот Алиса од Луис Карол.
Наводи
[уреди | уреди извор]- ↑ „注目DVD紹介：アニメ「serial experiments lain」がブルーレイで復活“. MANTANWEB（まんたんウェブ） (јапонски). 2010-11-01. Посетено на 2025-09-26.
- ↑ „きみは「serial experiments lain」を知っているか 20周年を経ていまだ続く実験“. ねとらぼ (јапонски). 2018-07-21. Посетено на 2025-09-26.
Надворешни врски
[уреди | уреди извор]- Serial Experiments Lain — Енциклопедија на Anime News Network (англиски)