Code Lyoko

Code Lyoko
Жанр	дзіцячы тэлевізійны серыял[d], навуковая фантастыка на тэлебачанні[d], прыгодніцкі тэлесерыял[d], экшан-тэлесерыял[d] і кіберпанк
Аўтар(ы)	Thomas Romain[d]
Краіна вытворчасці	Францыя
Мова	французская
Колькасць сезонаў	4
Тэлеканал(ы)	France 3[d]
Наступныя перадачы	Code Lyoko Evolution[d]
Спасылкі
web.archive.org/web/2014… web.archive.org/web/2005…
IMDb ID 0417311

Code Lyoko (бел.: Код Ліёка) — французскі анімацыйны серыял, створаны Томасам Рамэйнам і Таняй Палумба і cпрадзюсаваны студыямі Antefilms Production і MoonScoop для тэлеканалаў Cartoon Network, France 3 і Canal J. Чатыры падлетка — галоўныя героі серыяла — знаходзяць схаваны на пакінутай фабрыцы суперкамп’ютар, праз які атрымліваюць доступ да віртуальнага свету Ліёка (фр. Lyoko), а таксама абуджаюць варожы штучны інтэлект Зэна (фр.: Xana, стылізаваны як X.A.N.A.), які імкнецца да захопу і знішчэння рэальнага свету. Серыял адначасова выкарыстоўвае як традыцыйную 2D анімацыю, так і трохвымерны CGI. Першыя серыі выйшлі ў эфір 3 верасня 2003 года на канале France 3, а таксама 19 красавіка 2004 года на Cartoon Network у ЗША. На тэрыторыі Беларусі трансляцыя мультсерыяла адбывалася на тэлеканале Gulli.

Сюжэт

У пошуку новых дэталяў для зборкі сваіх робатаў, Джэрэмі Бэлпуа, васьмікласнік-вундэркінд Акадэміі Кадзік, знаходзіць квантавы суперкамп’ютар, схаваны на пакінутай аўтамабільнай фабрыцы каля сваёй школы. Пасля яго ўключэння ён вынаходзіць віртуальны свет пад назвай Ліёка, у якім знаходзіцца дзяўчына па імені Аэліта. У суперкамп’ютары таксама знаходзіцца Зэна, цалкам аўтаномная, злосная і разумная мультыагентная сістэма. Зэна мае на мэце знішчэнне ўсяго чалавецтва, і выкарыстоўваючы структуры на Ліёка, вядомыя як Вежы, Зэна можа атрымліваць доступ да рэальнага свету. Ён здольны валодаць электроннымі прыладамі, рознымі прадметамі і нават жывымі істотамі, каб дасягнуць сваёй мэты і знішчыць тых, хто перашкаджае гэтаму. Таксама Зэна можа кіраваць віртуальнымі істотамі на Ліёка — монстрамі, каб абараняць актываваныя Вежы. Хутка пра суперкамп’ютар даведваюцца тры іншых студэнта акадэміі — Ульрых Штэрн, Юмі Ішыяма і Одд Дэла-Робія. У далейшым чацвёра падлеткаў становіцца сябрамі, якіх аб’ядняе барацьба з Зэнай праз перанясенне ў Ліёка (віртуалізацыю) і дэзактывацыю Веж пры дапамозе Аэліты. Акрамя таго, падлеткі маюць доступ да праграмы «Вяртанне ў мінулае», якая дапамагае скасаваць усе разбурэнні і пашкоджанні, якія прычыніў Зэна падчас сваіх нападаў, а таксама схаваць існаванне суперкамп’ютара ад астатніх.

Нягледзячы на тое, што наяўнасць Зэны з’яўляецца вялікай небяспекай для ўсяго свету, сябры не збіраюцца адключыць суперкамп’ютар, бо Джэрэмі моцна матываваны перанесці Аэліту ў рэальны свет, да якой мае рамантычныя пачуцці. Матэрыялізацыя Аэліты становіцца галоўнай тэмай першага сезону. У апошнім эпізодзе пад назвай «Код: Зямля» гэта нарэшце адбываецца, але група выяўляе, што Аэліта мае вірус, які заб’е яе, калі суперкамп’ютар будзе выключаны. Не маючы іншага выбару, падлеткі працягваюць барацьбу супраць Зэны.

У другім сезоне Аэліта спрабуе адаптавацца да жыцця ў рэальным свеце, а Джэрэмі спрабуе распрацаваць антывірусную праграму, каб вызваліць яе з-пад уплыву Зэны. Зэна, у сваю чаргу, спрабуе скрасці з памяці Аэліты «ключы да Ліёка» — радкі кода, патрэбныя для таго, каб уцячы з суперкамп’ютара ў неабмежаваную сусветную сетку. На Ліёка Джэрэмі знаходзіць новы, пяты сектар, з якога можна здабываць больш даных пра віртуальны свет. Сябры пачынаюць раскрываць інфармацыю пра таямнічага Франца Хопера, магчымага стваральніка суперкамп’ютара, які знік дзесяць гадоў таму. У рэшце рэшт выяўляецца, што Хопер жывы і хаваецца ў глыбінях Ліёка. У канцы сезона група выяўляе, што Аэліта насамрэч заўсёды была чалавекам і біялагічнай дачкою Хопера. Яна не заражана вірусам, а для таго каб паўнавартасна жыць на Зямлі без залежнасці ад суперкамп’ютара, ёй нестае часткі яе памяці: успамінаў пра яе жыццё на Зямлі да таго, як яна віртуалізавалася на Ліёка разам з бацькам. Менавіта гэтыя часткі памяці і былі «ключамі да Ліёка», які Зэна намагаўся скрасць. У серыі «Ключ» Зэна здолеў падмануць сяброў, скрасць памяць Аэліты і ўцячы з суперкамп’ютара. Аэліта, здаецца, гіне, але Хопер адраджае яе і аднаўляе яе памяць разам з нестаючымі фрагментамі.

У трэцім сезоне больш не абмежаваны суперкамп’ютарам Зэна спрабуе знішчыць Ліёка, сціраючы кожны з яго сектараў, усутыч да пятага сектара. Сябры, спачатку неахвотна, але вырашаюць запрасіць шостага ўдзельніка групы — Уільяма Данбара. Аднак неўзабаве пасля віртуалізацыі ён трапляе пад кантроль Зэны і знішчае Ядро Ліёка, поўнасцю сціраючы віртуальны свет і робячы групу няздольнай змагацца з Зэнай. Сябры, думаючы, што гэта іх параза, раптоўна атрымліваюць закадаванае паведамленне ад Франца Хопера, якое змяшчае інфармацыю, неабходную для аднаўлення Ліёка.

У чацвёртым сезоне Джэрэмі і Аэліта рэканструююць знішчаныя сектары Ліёка і будуюць лічбавую падводную лодку пад назвай Скідбладнір, пры дапамозе якой сябры вандруюць па Лічбавым моры і змагаюцца з Зэнай у сеціве праз знішчэнне Рэплік — копій сектараў Ліёка, злучаных з іншымі суперкамп’ютарамі на Зямлі, якія кантралюе Зэна. Падкантрольны Уільям выкарыстоўваецца Зэнай для абароны Рэплік і нападаў на Воінаў Ліёка. Каб пазбегнуць падазрэнняў адносна знікнення Уільяма ў рэальным свеце, Джэрэмі стварае часовы клон хлопца. Гэта мае поспех, хоць дзіўныя паводзіны клона і бянтэжаць настаўнікаў і вучняў да таго моманту, пакуль Джэрэмі не знаходзіць спосаб вызваліць сапраўднага Уільяма. Бліжэй да канца сезона Зэна вырашае сабраць энергію з усіх сваіх Рэплік, каб стварыць Калоса — наймацнейшнага і найвялікшага за ўсіх монстра, які знішчае Скідбладнір. У адказ Джэрэмі пры падтрымцы Франца Хопера стварае праграму «Анты-Зэна», якая здольная назаўсёды знішчыць злосны штучны інтэлект. Аднак каб актываваць яе, Хопер быў вымушаны ахвяраваць сваім жыццём. Пасля поўнага знішчэння пагрозы, сябры назаўсёды адключаюць суперкамп’ютар.